دشت احساس میں ہم اتنے اکیلے کب تھے

دشت احساس میں ہم اتنے اکیلے کب تھے

دکھ تو پہلے بھی تھے پر اتنے گھنیرے کب تھے

ہم تو نکلے تھے ہواؤں کا مقدر لے کر

ہم کسی موڑ پہ دم لینے کو ٹھہرے کب تھے

جیسے انجان کوئی جیسے کوئی بیگانہ

خود سے کترا کے ہم ایسے بھی نکلتے کب تھے

بغض کی دھوپ سے ہم بھاگ کے جاتے تو کہاں

شہر احباب میں وا دل کے دریچے کب تھے

ہر طرف شاخوں پہ لٹکی تھی صباؔ خاموشی

رات کے پیڑ میں آواز کے جھولے کب تھے

dasht-e-ehsas mein ham itne akele kab the

dukh to pahle bhi the par itne ghanire kab the

ham to nikle the hawaon ka muqaddar le kar

ham kisi mor pe dam lene ko thahre kab the

jaise anjan koi jaise koi begana

khud se katra ke ham aise bhi nikalte kab the

bughz ki dhup se ham bhag ke jate to kahan

shahr ahbab mein wa dil ke dariche kab the

har taraf shakhon pe latki thi saba khamoshi

rat ke per mein awaz ke jhule kab the