وقت کے دشت میں چونکے ہوئے آہو کی طرح

وقت کے دشت میں چونکے ہوئے آہو کی طرح

ہم پریشان ازل سے رہے خوشبو کی طرح

بند دروازوں کے اندر جو ہوئی تھی اک بات

شہر میں پھیل گئی پھول کی خوشبو کی طرح

شب کی تنہائی میں نغمہ سا بکھر جاتا ہے

سوکھے پتوں میں اک آواز ہے گھنگھرو کی طرح

اک حسیں جسم کو آغوش میں بھرنے کے لئے

آرزو پھیلی ہوئی ہے کسی بازو کی طرح

ہجر کا درد کئی صدیوں سے بیٹھا ہے صباؔ

دل کے پیپل کی گھنی چھاؤں میں سادھو کی طرح

waqt ke dasht mein chaunke hue ahu ki tarah

ham pareshan azal se rahe khushbu ki tarah

band darwazon ke andar jo hui thi ik bat

shahr mein phail gai phul ki khushbu ki tarah

shab ki tanhai mein naghma sa bikhar jata hai

sukhe patton mein ik awaz hai ghunghru ki tarah

ik hasin jism ko aghosh mein bharne ke liye

arzu phaili hui hai kisi bazu ki tarah

hijr ka dard kai sadiyon se baitha hai saba

dil ke pipal ki ghani chhaon mein sadho ki tarah