زندگانی ہنس کے طے اپنا سفر کر جائے گی

زندگانی ہنس کے طے اپنا سفر کر جائے گی

یوں اجل کا معجزہ اک روز سر کر جائے گی

کیا خبر تھی چاہ اس کی دل میں گھر کر جائے گی

مجھ کو خود میرے ہی اندر در بدر کر جائے گی

پہلے اپنا خوں تو بھر دوں زندگی کی مانگ میں

جب اسے جانا ہی ٹھہرا بن سنور کر جائے گی

پھول لے جائے گی سارے توڑ کر خوابوں کے وہ

میری شاخ زندگی کو بے ثمر کر جائے گی

آئے گی اک روز وہ شب کی سیاہی اوڑھ کر

میری صبح زیست کو روشن سحر کر جائے گی

روک لو اس درد کی دیوی سے ہیں سب رونقیں

یہ گئی گر روٹھ کر دل کو کھنڈر کر جائے گی

لوگ کہتے ہیں کہ وہ لڑکی سلیقہ مند ہے

آ گئی اس گھر میں تو اس گھر کو گھر کر جائے گی

zindagani hans ke tai apna safar kar jaegi

yun ajal ka mojiza ik roz sar kar jaegi

kya khabar thi chah us ki dil mein ghar kar jaegi

mujh ko khud mere hi andar dar badar kar jaegi

pahle apna khun to bhar dun zindagi ki mang mein

jab use jana hi thahra ban sanwar kar jaegi

phul le jaegi sare tor kar khwabon ke wo

meri shakh-e-zindagi ko be samar kar jaegi

aegi ik roz wo shab ki siyahi orh kar

meri subh-e-zist ko raushan sahar kar jaegi

rok lo is dard ki dewi se hain sab raunaqen

ye gai gar ruth kar dil ko khandar kar jaegi

log kahte hain ke wo larki saliqa mand hai

a gai is ghar mein to is ghar ko ghar kar jaegi