خاشاک سے خزاں میں رہا نام باغ کا

خاشاک سے خزاں میں رہا نام باغ کا

ورنہ تو ہر درخت پہ قبضہ ہے زاغ کا

حیرت ہے سب تلاش پہ اس کی رہے مصر

پایا گیا سراغ نہ جس بے سراغ کا

ہے ارتکاز ذات میں وقفہ ذرا سی دیر

ٹوٹا نہیں ہے رابطہ لو سے چراغ کا

کب کس پہ مہربان ہو اور کب الٹ پڑے

کس کو یہاں پتا ہے کسی کے دماغ کا

ہوتا ہے پھر وہ اور کسی یاد کے سپرد

رکھتا ہوں جو سنبھال کے لمحہ فراغ کا

مشق سخن میں دل بھی ہمیشہ سے ہے شریک

لیکن ہے اس میں کام زیادہ دماغ کا

khashak se khizan mein raha nam bagh ka

warna to har darakht pe qabza hai zagh ka

hairat hai sab talash pe us ki rahe musir

paya gaya suragh na jis be suragh ka

hai irtikaz zat mein waqfa zara si der

tuta nahin hai rabta lau se charagh ka

kab kis pe mehrban ho aur kab ulat pare

kis ko yahan pata hai kisi ke dimagh ka

hota hai phir wo aur kisi yad ke supurd

rakhta hun jo sambhal ke lamha faragh ka

mashq-e-sukhan mein dil bhi hamesha se hai sharik

lekin hai is mein kam ziyada dimagh ka