نہ رکتے ہیں آنسو نہ تھمتے ہیں نالے

نہ رکتے ہیں آنسو نہ تھمتے ہیں نالے

کہو کوئی کیسے محبت چھپا لے

کرے کوئی کیا گر وہ آئیں یکایک

نگاہوں کو روکے کہ دل کو سنبھالے

چمن والے بجلی سے بولے نہ چالے

غریبوں کے گھر بے خطا پھونک ڈالے

قیامت ہیں ظالم کی نیچی نگاہیں

خدا جانے کیا ہو جو نظریں اٹھا لے

کروں ایسا سجدہ وہ گھبرا کے کہہ دیں

خدا کے لیے اب تو سر کو اٹھا لے

تمہیں بندہ پرور ہمیں جانتے ہیں

بڑے سیدھے سادھے بڑے بھولے بھالے

بس اتنی سی دوری یہ میں ہوں یہ منزل

کہاں آ کے پھوٹے ہیں پاؤں کے چھالے

قمرؔ میں ہوں مختار تنظیم شب کا

ہیں میرے ہی بس میں اندھیرے اجالے

na rukte hain ansu na thamte hain nale

kaho koi kaise mohabbat chhupa le

kare koi kya gar wo aen yakayak

nigahon ko roke ke dil ko sambhale

chaman wale bijli se bole na chale

gharibon ke ghar be khata phunk dale

qayamat hain zalim ki nichi nigahen

khuda jane kya ho jo nazren utha le

karun aisa sajda wo ghabra ke kah den

khuda ke liye ab to sar ko utha le

tumhen banda parwar hamen jante hain

bare sidhe sadhe bare bhule bhale

bas itni si duri ye main hun ye manzil

kahan a ke phute hain paon ke chhale

qamar mein hun mukhtar tanzim shab ka

hain mere hi bas mein andhere ujale