تم کو ہم خاک نشینوں کا خیال آنے تک

تم کو ہم خاک نشینوں کا خیال آنے تک

شہر تو شہر بدل جائیں گے ویرانے تک

دیکھیے محفل ساقی کا نتیجہ کیا ہو

بات شیشے کی پہنچنے لگی پیمانے تک

اس جگہ بزم ساقی نے بٹھایا ہے ہمیں

ہاتھ پھیلائیں تو جاتا نہیں پیمانے تک

صبح ہوتی نہیں اے عشق یہ کیسی شب ہے

قیس و فرہاد کے دہرا لئے افسانے تک

پھر نہ طوفان اٹھیں گے نہ گرے گی بجلی

یہ حوادث ہیں غریبوں ہی کے مٹ جانے تک

میں نے ہر چند بلا ٹالنی چاہی لیکن

شیخ نے ساتھ نہ چھوڑا مرا مے خانے تک

وہ بھی کیا دن تھے کہ گھر سے کہیں جاتے ہی نہ تھے

اور گئے بھی تو فقط شام کو مے خانے تک

میں وہاں کیسے حقیقت کو سلامت رکھوں

جس جگہ رد و بدل ہو گئے افسانے تک

باغباں فصل بہار آنے پہ وعدہ تو قبول

اور اگر ہم نہ رہے فصل بہار آنے تک

اور تو کیا کہوں اے شیخ تری ہمت پر

کوئی کافر ہی گیا ہو ترے مے خانے تک

اے قمرؔ شام کا وعدہ ہے وہ آتے ہوں گے

شام کہلاتی ہے تاروں کے نکل آنے تک

اے قمر صبح ہوئی اب تو اٹھو محفل سے

شمع گل ہو گئی رخصت ہوئے پروانے تک

tum ko ham khak nashinon ka khayal ane tak

shahr to shahr badal jaenge wirane tak

dekhiye mahfil saqi ka natija kya ho

bat shishe ki pahunchne lagi paimane tak

is jagah bazm-e-saqi ne bithaya hai hamen

hath phailaen to jata nahin paimane tak

subh hoti nahin ai ishq ye kaisi shab hai

qais-o-farhad ke dohra liye afsane tak

phir na tufan uthenge na giregi bijli

ye hawadis hain gharibon hi ke mit jane tak

main ne har chand bala talni chahi lekin

shaikh ne sath na chhora mira mai khane tak

wo bhi kya din the ke ghar se kahin jate hi na the

aur gae bhi to faqat sham ko mai khane tak

main wahan kaise haqiqat ko salamat rakhun

jis jagah rad-o-badal ho gae afsane tak

baghban fasl-e-bahar ane pe waada to qubul

aur agar ham na rahe fasl-e-bahar ane tak

aur to kya kahun ai shaikh tiri himmat par

koi kafir hi gaya ho tire mai khane tak

ai qamar sham ka waada hai wo ate honge

sham kahlati hai taron ke nikal ane tak

ai qamar subh hui ab to utho mahfil se

shama gul ho gai rukhsat hue parwane tak