یوں تمہارے ناتوان شوق منزل بھر چلے

یوں تمہارے ناتوان شوق منزل بھر چلے

کھائی ٹھوکر گر پڑے گر کر اٹھے اٹھ کر چلے

چھوڑ کر بیمار کو یہ کیا قیامت کر چلے

دم نکلنے بھی نہ پایا آپ اپنے گھر چلے

ہو گیا صیاد برہم اے اسیران قفس

بند اب یہ نالہ و فریاد ورنہ پر چلے

کس طرح طے کی ہے منزل عشق کی ہم نے نہ پوچھ

تھک گئے جب پاؤں تیرا نام لے لے کر چلے

آ رہے ہیں اشک آنکھوں میں اب اے ساقی نہ چھیڑ

بس چھلکنے کی کسر باقی ہے ساغر بھر چلے

جب بھی خالی ہاتھ تھے اور اب بھی خالی ہاتھ ہیں

لے کے ہم دنیا میں کیا آئے تھے کیا لے کر چلے

حسن کو غمگین دیکھے عشق یہ ممکن نہیں

روک لے اے شمع آنسو اب پتنگے مر چلے

اس طرف بھی اک نظر ہم بھی کھڑے ہیں دیر سے

مانگنے والے تمہارے در سے جھولی بھر چلے

اے قمرؔ شب ختم ہونے کو ہے چھوڑو انتظار

ساحل شب سے ستارے بھی کنارہ کر چلے

yun tumhare natawan-e-shauq manzil bhar chale

khai thokar gir pare gir kar uthe uth kar chale

chhor kar bimar ko ye kya qayamat kar chale

dam nikalne bhi na paya ap apne ghar chale

ho gaya sayyad barham ai asiran-e-qafas

band ab ye nala-o-fariyad warna par chale

kis tarah tai ki hai manzil ishq ki ham ne na puchh

thak gae jab paon tera nam le le kar chale

a rahe hain ashk ankhon mein ab ai saqi na chher

bas chhalakne ki kasar baqi hai saghar bhar chale

jab bhi khali hath the aur ab bhi khali hath hain

le ke ham duniya mein kya ae the kya le kar chale

husn ko ghamgin dekhe ishq ye mumkin nahin

rok le ai shama ansu ab patange mar chale

is taraf bhi ik nazar ham bhi khare hain der se

mangne wale tumhare dar se jholi bhar chale

ai qamar shab khatm hone ko hai chhoro intizar

sahil-e-shab se sitare bhi kinara kar chale