عکس ابھرا نہ تھا آئینۂ دل داری کا

عکس ابھرا نہ تھا آئینۂ دل داری کا

ہجر نے کھینچ دیا دائرہ زنگاری کا

ناز کرتا تھا طوالت پہ کہ وقت رخصت

بھید سائے پہ کھلا شام کی عیاری کا

جس قدر خرچ کیے سانس ہوئی ارزانی

نرخ گرتا گیا رسم و رہ بازاری کا

رات نے خواب سے وابستہ رفاقت کے عوض

راستہ بند رکھا دن کی نموداری کا

ایسا ویران ہوا ہے کہ خزاں روتی ہے

کل بہت شور تھا جس باغ میں گل کاری کا

بے سبب جمع تو کرتا نہیں تیر و ترکش

کچھ ہدف ہوگا زمانے کی ستم گاری کا

پا بہ زنجیر کیا تھا مجھے آسانی نے

مرحلہ ہو نہ سکا طے کبھی دشواری کا

مطمئن دل ہے عجب بھیڑ سے غم خواروں کی

سلسلہ طول پکڑ لے نہ یہ بیماری کا

aks ubhra na tha aina-e-dil dari ka

hijr ne khinch diya daira zangari ka

naz karta tha tawalat pe ke waqt-e-rukhsat

bhed sae pe khula sham ki ayyari ka

jis qadar kharch kiye sans hui arzani

nirkh girta gaya rasm-o-rah-e-bazari ka

rat ne khwab se wabasta rifaqat ke ewaz

rasta band rakha din ki numudari ka

aisa wiran hua hai ke khizan roti hai

kal bahut shor tha jis bagh mein gul kari ka

be sabab jama to karta nahin tir-o-tarkash

kuchh hadaf hoga zamane ki sitam gari ka

pa ba zanjir kya tha mujhe asani ne

marhala ho na saka tai kabhi dushwari ka

mutmain dil hai ajab bhir se gham khwaron ki

silsila tul pakar le na ye bimari ka