ترے نثار نہ دیکھی کوئی خوشی میں نے

ترے نثار نہ دیکھی کوئی خوشی میں نے

کہ اب تو موت کو سمجھا ہے زندگی میں نے

یہ دل میں سوچ کے توبہ بھی توڑ دی میں نے

نہ جانے کیا کہے ساقی اگر نہ پی میں نے

کوئی بلا مرے سر پر ضرور آئے گی

کہ تیری زلف پریشاں سنوار دی میں نے

سحر ہوئی شب وعدہ کا اضطراب گیا

ستارے چھپ گئے گل کر دی روشنی میں نے

سوائے دل مجھے دیر و حرم سے کیا مطلب

جگہ حضور کے ملنے کی ڈھونڈ لی میں نے

جہاں چلا دیا ساغر کا دور اے واعظ

وہیں پہ گردش ایام روک دی میں نے

بلائیں لینے پہ آپ اتنے ہو گئے برہم

حضور کون سی جاگیر چھین لی میں نے

دعائیں دو مجھے در در جنوں میں پھر پھر کر

تمہاری شہرتیں کر دیں گلی میں نے

جواب اس کا تو شاید فلک بھی دے نہ سکے

وہ بندگی جو تری رہ گزر میں کی میں نے

وہ جانے کیسے پتہ دے گئے تھے گلشن کا

نہ چھوڑا پھول نہ چھوڑی کلی کلی میں نے

قمرؔ وہ نیند میں تھے ان کو کیا خبر ہوگی

کہ ان پہ شب کو لٹائی ہے چاندنی میں نے

tire nisar na dekhi koi khushi main ne

ke ab to maut ko samjha hai zindagi main ne

ye dil mein soch ke tauba bhi tor di main ne

na jane kya kahe saqi agar na pi main ne

koi bala mire sar par zarur aegi

ke teri zulf-e-pareshan sanwar di main ne

sahar hui shab-e-waada ka iztirab gaya

sitare chhup gae gul kar di raushni main ne

siwae dil mujhe dair-o-haram se kya matlab

jagah huzur ke milne ki dhund li main ne

jahan chala diya saghar ka daur ai waiz

wahin pe gardish-e-ayyam rok di main ne

balaen lene pe ap itne ho gae barham

huzur kaun si jagir chhin li main ne

duaen do mujhe dar dar junun mein phir phir kar

tumhari shohraten kar den gali main ne

jawab us ka to shayad falak bhi de na sake

wo bandagi jo tiri rah guzar mein ki main ne

wo jane kaise pata de gae the gulshan ka

na chhora phul na chhori kali kali main ne

qamar wo nind mein the un ko kya khabar hogi

ke un pe shab ko lutai hai chandni main ne