دیکھتے ہیں رقص میں دن رات پیمانے کو ہم

دیکھتے ہیں رقص میں دن رات پیمانے کو ہم

ساقیا راس آ گئے ہیں تیرے مے خانے کو ہم

لے کے اپنے ساتھ اک خاموش دیوانے کو ہم

جا رہے ہیں حضرت ناصح کو سمجھانے کو ہم

یاد رکھیں گے تمہاری بزم میں آنے کو ہم

بیٹھنے کے واسطے اغیار اٹھ جانے کو ہم

حسن مجبور ستم ہے عشق مجبور وفا

شمع کو سمجھائیں یا سمجھائیں پروانے کو ہم

رکھ کے تنکے ڈر رہے ہیں کیا کہے گا باغباں

دیکھتے ہیں آشیاں کی شاخ جھک جانے کو ہم

الجھنیں طول شب فرقت کی آگے آ گئیں

جب کبھی بیٹھے کسی کی زلف سلجھانے کو ہم

راستے میں رات کو مڈبھیڑ ساقی کچھ نہ پوچھ

مڑ رہے تھے شیخ جی مسجد کو بت خانے کو ہم

شیخ جی ہوتا ہے اپنا کام اپنے ہاتھ سے

اپنی مسجد کو سنبھالیں آپ بت خانے کو ہم

دو گھڑی کے واسطے تکلیف غیروں کو نہ دے

خود ہی بیٹھے ہیں تری محفل سے اٹھ جانے کو ہم

آپ قاتل سے مسیحا بن گئے اچھا ہوا

ورنہ اپنی زندگی سمجھے تھے مر جانے کو ہم

سن کے شکوہ حشر میں کہتے ہو شرماتے نہیں

تم ستم کرتے پھرو دنیا پہ شرمانے کو ہم

اے قمرؔ ڈر تو یہ ہے اغیار دیکھیں گے انہیں

چاندنی شب میں بلا لائیں بلا لانے کو ہم

dekhte hain raqs mein din rat paimane ko ham

saqiya ras a gae hain tere mai khane ko ham

le ke apne sath ik khamosh diwane ko ham

ja rahe hain hazrat-e-naseh ko samjhane ko ham

yad rakhenge tumhari bazm mein ane ko ham

baithne ke waste aghyar uth jane ko ham

husn majbur-e-sitam hai ishq majbur-e-wafa

shama ko samjhaen ya samjhaen parwane ko ham

rakh ke tinke dar rahe hain kya kahega baghban

dekhte hain ashiyan ki shakh jhuk jane ko ham

uljhanen tul-e-shab-e-furqat ki age a gain

jab kabhi baithe kisi ki zulf sulajhane ko ham

raste mein rat ko madbhir saqi kuchh na puchh

mur rahe the shaikh ji masjid ko but khane ko ham

shaikh ji hota hai apna kam apne hath se

apni masjid ko sambhalen ap but khane ko ham

do ghari ke waste taklif ghairon ko na de

khud hi baithe hain tiri mahfil se uth jane ko ham

ap qatil se masiha ban gae achchha hua

warna apni zindagi samjhe the mar jane ko ham

sun ke shikwa hashr mein kahte ho sharmate nahin

tum sitam karte phiro duniya pe sharmane ko ham

ai qamar dar to ye hai aghyar dekhenge unhen

chandni shab mein bala laen bala lane ko ham