کون سے تھے وہ تمہارے عہد جو ٹوٹے نہ تھے

کون سے تھے وہ تمہارے عہد جو ٹوٹے نہ تھے

خیر ان باتوں میں کیا رکھا ہے تم جھوٹے نہ تھے

باغباں کچھ سوچ کر ہم قید سے چھوٹے نہ تھے

ورنہ کچھ پاؤں نہ تھے بیکار پر ٹوٹے نہ تھے

خار جب اہل جنوں کے پاؤں میں ٹوٹے نہ تھے

دامن صحرا پہ یہ رنگین گل بوٹے نہ تھے

رہ گئی محروم آزادی کے نغموں سے بہار

کیا کریں قید زباں بندی سے ہم چھوٹے نہ تھے

اس جوانی سے تو اچھی تھی تمہاری کم سنی

بھول تو جاتے تھے وعدوں کو مگر جھوٹے نہ تھے

اس زمانے سے دعا کی ہے بہاروں کے لئے

جب فقط ذکر چمن بندی تھا گل بوٹے نہ تھے

کیا یہ سچ ہے اے مرے صیاد گلشن لٹ گیا

جب تو میرے سامنے دو پھول بھی ٹوٹے نہ تھے

چھوڑ تو دیتے تھے رستے میں ذرا سی بات پر

رہبروں نے منزلوں پر قافلے لوٹے نہ تھے

کس قدر آنسو بہائے تم نے شام غم قمرؔ

اتنے تارے تو فلک سے بھی کبھی ٹوٹے نہ تھے

kaun se the wo tumhare ahd jo tute na the

khair in baton mein kya rakha hai tum jhute na the

baghban kuchh soch kar ham qaid se chhote na the

warna kuchh paon na the bekar par tute na the

khar jab ahl-e-junun ke paon mein tute na the

daman-e-sahra pe ye rangin gul bute na the

rah gai mahrum azadi ke naghmon se bahar

kya karen qaid-e-zaban bandi se ham chhote na the

is jawani se to achchhi thi tumhari kam suni

bhul to jate the waadon ko magar jhute na the

is zamane se dua ki hai baharon ke liye

jab faqat zikr-e-chaman bandi tha gul bute na the

kya ye sach hai ai mire sayyad gulshan lut gaya

jab to mere samne do phul bhi tute na the

chhor to dete the raste mein zara si bat par

rahbaron ne manzilon par qafile laute na the

kis qadar ansu bahae tum ne sham-e-gham qamar

itne tare to falak se bhi kabhi tute na the