کبھی قطار سے باہر کبھی قطار کے بیچ

کبھی قطار سے باہر کبھی قطار کے بیچ

میں ہجر زاد ہوا خرچ انتظار کے بیچ

بنا ہوا ہے تعلق سا استواری کا

مرے طواف سے اس محور و مدار کے بیچ

کہ آتا جاتا رہے عکس حیرتی اس میں

بچھا دیا گیا آئینہ آر پار کے بیچ

ہوا کے کھیل میں شرکت کے واسطے مجھ کو

خزاں نے شاخ سے پھینکا ہے رہ گزار کے بیچ

یہ میں ہوں تو ہے ہیولیٰ ہے ہر مسافر کا

جو مٹ رہا ہے تھکن سے ادھر غبار کے بیچ

کوئی لکیر سی پانی کی جھلملاتی ہے

کبھی کبھی مرے متروک آبشار کے بیچ

میں عمر کو تو مجھے عمر کھینچتی ہے الٹ

تضاد سمت کا ہے اسپ اور سوار کے بیچ

kabhi qatar se bahar kabhi qatar ke bich

main hijr zad hua kharch intizar ke bich

bana hua hai taalluq sa ustuwari ka

mire tawaf se is mehwar-o-madar ke bich

ke ata jata rahe aks hairati is mein

bichha diya gaya aina ar par ke bich

hawa ke khel mein shirkat ke waste mujh ko

khizan ne shakh se phenka hai rah guzar ke bich

ye main hun to hai hayula hai har musafir ka

jo mit raha hai thakan se idhar ghubar ke bich

koi lakir si pani ki jhilmilati hai

kabhi kabhi mire matruk abshar ke bich

main umr ko to mujhe umr khinchti hai ulat

tazad samt ka hai asp aur sawar ke bich