آج رسوا ہیں تو ہم کوچہ و بازار بہت

آج رسوا ہیں تو ہم کوچہ و بازار بہت

یا کبھی گیت بھی گاتے تھے سر دار بہت

اپنے حالات کو سلجھاؤ تو کچھ بات بنے

مل بھی جائیں گے کبھی گیسوئے خم دار بہت

دل کے زخموں کو بھی ممکن ہو تو دیکھو ورنہ

چاند سے چہرے بہت پھول سے رخسار بہت

آج ماحول میں فتنے ہیں سر دیر و حرم

آج بہتر ہے پرستش کو در یار بہت

لٹ گئے ایک ہی انگڑائی میں ایسا بھی ہوا

عمر بھر پھرتے رہے بن کے جو ہشیار بہت

اجنبی بن کے رہے شہر میں ہم حالانکہ

سایۂ زلف بہت سایۂ دیوار بہت

قیسؔ نا‌ قدریٔ احباب کا شکوہ ہے فضول

کوئی یوسف ہی نہیں ورنہ خریدار بہت

aj ruswa hain to ham kucha-o-bazar bahut

ya kabhi git bhi gate the sar-e-dar bahut

apne halat ko saljhao to kuchh bat bane

mil bhi jaenge kabhi gesu-e-kham dar bahut

dil ke zakhmon ko bhi mumkin ho to dekho warna

chand se chehre bahut phul se rukhsar bahut

aj mahaul mein fitne hain sar-e-dair-o-haram

aj behtar hai parastish ko dar-e-yar bahut

lut gae ek hi angrai mein aisa bhi hua

umr bhar phirte rahe ban ke jo hushyar bahut

ajnabi ban ke rahe shahr mein ham halanke

saya-e-zulf bahut saya-e-diwar bahut

qais na qadari-e-ahbab ka shikwa hai fuzul

koi yusuf hi nahin warna kharidar bahut