آتا نہیں ہے اب کسی دم ساز کا خیال

آتا نہیں ہے اب کسی دم ساز کا خیال

دل میں بسا گیا وہ اس انداز کا خیال

اکثر وہ اس کی چشم فسوں ساز کا خیال

تا دیر پھر وہ حسرت پرواز کا خیال

احساس درد و غم سے زیادہ ہے معتبر

اس دل نواز صاحب اعجاز کا خیال

کیا جانے فرط شوق میں کس دم پکار لے

اب ہم ہیں اور دوست کی آواز کا خیال

تاریکیوں کی سمت نہ جانے دیا کبھی

خورشید بن گیا نگہ ناز کا خیال

وہ خود بلندیوں کی حدیں توڑتے نہیں

ان کو ہے میری طاقت پرواز کا خیال

جی چاہتا ہے جائیے پھر راہ شوق میں

آنے لگا ہے پھر کسی ہم راز کا خیال

توقیر پائی جس کے سبب سے ربابؔ نے

رکھا نہیں اس اپنی تگ و تاز کا خیال

ata nahin hai ab kisi dam saz ka khayal

dil mein basa gaya wo is andaz ka khayal

aksar wo us ki chashm-e-fusun saz ka khayal

ta der phir wo hasrat-e-parwaz ka khayal

ehsas-e-dard-o-gham se ziyada hai motabar

is dil nawaz sahab-e-ejaz ka khayal

kya jane fart-e-shauq mein kis dam pukar le

ab ham hain aur dost ki awaz ka khayal

tarikiyon ki samt na jane diya kabhi

khurshid ban gaya nigah-e-naz ka khayal

wo khud bulandiyon ki haden torte nahin

un ko hai meri taqat-e-parwaz ka khayal

ji chahta hai jaiye phir rah-e-shauq mein

ane laga hai phir kisi ham raz ka khayal

tauqir pai jis ke sabab se rabab ne

rakha nahin is apni tag-o-taz ka khayal