جب بھی گزرے ہوئے لمحات کو دہراتے ہیں

جب بھی گزرے ہوئے لمحات کو دہراتے ہیں

ہم خود اپنے ہی خیالوں میں الجھ جاتے ہیں

بھیڑ اتنی ہے کہ نظریں نہیں جمنے پاتیں

اور منظر ہیں کہ تیزی سے بدل جاتے ہیں

کچھ دنوں سے جو یہ چاہا ہے کہ منزل نہ ملے

میری سمت آتے ہوئے حادثے کتراتے ہیں

اس روایت سے بہت جی کا زیاں ہوتا ہے

اب تو ہم پرسش احوال سے گھبراتے ہیں

خود سے اکتائے ہوئے بزم سے کترائے ہوئے

اب مرے ساتھ کئی لوگ نظر آتے ہیں

جو بھی رکھتے ہیں یہاں قوت اظہار نمو

بیج وہ سخت چٹانوں پہ بھی جم جاتے ہیں

کبھی تنہا نہیں آتے ہیں پرانے لمحے

کتنے ہی پھولوں کی ہمراہ مہک لاتے ہیں