تجھ سے جب تک اس طرح اپنی شناسائی نہ تھی

تجھ سے جب تک اس طرح اپنی شناسائی نہ تھی

اپنے گھر جیسی تو صحرا میں بھی تنہائی نہ تھی

اب تو رشک آتا ہے خود اپنے ہی جملوں پر ہمیں

اس سے پہلے تھی مگر یہ شان گویائی نہ تھی

اب مجھے کیوں اپنے مستقبل کا آتا ہے خیال

آج تک شاید مرے ہم راہ دانائی نہ تھی

تجربوں کے واسطے کچھ لغزشوں کی چھوٹ ہے

اب میں سمجھا کیوں مجھے ہر بات سمجھائی نہ تھی

عالم حیرت میں گزرے ہیں وہاں سے بھی جہاں

زندگی اپنی طرح بے عکس و بے آئینہ تھی

وہ کہاں ہے منظروں میں ڈھونڈتے ہو تم جسے

گھر سے کیوں نکلے تھے جب نظروں میں رعنائی نہ تھی

تجھ سے ملنے تک نہ تھا خود اعتمادی کا پتا

اور کچھ اپنی طبیعت نے جلا پائی نہ تھی

ویسے تو اب تک بنائیں کتنی تصویریں ربابؔ

شوق کی حد تک مگر رنگوں میں گہرائی نہ تھی

tujh se jab tak is tarah apni shanasai na thi

apne ghar jaisi to sahra mein bhi tanhai na thi

ab to rashk ata hai khud apne hi jumlon par hamen

is se pahle thi magar ye shan-e-goyai na thi

ab mujhe kyun apne mustaqbil ka ata hai khayal

aj tak shayad mire ham rah danai na thi

tajribon ke waste kuchh laghzishon ki chhut hai

ab main samjha kyun mujhe har bat samjhai na thi

alam-e-hairat mein guzre hain wahan se bhi jahan

zindagi apni tarah be aks-o-be aina thi

wo kahan hai manzaron mein dhundte ho tum jise

ghar se kyun nikle the jab nazron mein raanai na thi

tujh se milne tak na tha khud etimadi ka pata

aur kuchh apni tabiat ne jala pai na thi

waise to ab tak banaen kitni taswiren rabab

shauq ki had tak magar rangon mein gahrai na thi