تیرا کیا جاتا جو ملتا جام ریحانی مجھے

تیرا کیا جاتا جو ملتا جام ریحانی مجھے

مے کے بدلے ساقیا تو نے دیا پانی مجھے

مے گساری میں وہ اب پہلی سی کیفیت نہیں

دے دیا ساقی نے کیا بے کیف سا پانی مجھے

اب کسی مشروب سے دل چین پا سکتا نہیں

کاش وہ آ کے پلا دے تیغ کا پانی مجھے

دے دیا ساقی نے بھر کر مجھ کو بھی جام شراب

میں تو کہتا ہی رہا پانی مجھے پانی مجھے

اس کو جانوں یار مخلص اس کو مانوں غم گسار

جو پلا دے رنج میں کلفت ربا پانی مجھے

چل پڑیں سانسیں دھڑکنے لگ گئیں نبض حیات

کیا کسی نے دے دیا انگور کا پانی مجھے

وہ تپ غم ہے کہ سوکھے ہیں لب و کام و دہن

کاش آ کر وہ پلائیں دید کا پانی مجھے

پی رہا ہوں شوق سے اے رازؔ جس کو آج تک

ایک دن آخر ڈبو دے گا وہی پانی مجھے

tera kya jata jo milta jam raihani mujhe

mai ke badle saqiya tu ne diya pani mujhe

mai gusari mein wo ab pahli si kaifiyat nahin

de diya saqi ne kya be kaif sa pani mujhe

ab kisi mashrub se dil chain pa sakta nahin

kash wo a ke pila de tegh ka pani mujhe

de diya saqi ne bhar kar mujh ko bhi jam-e-sharab

main to kahta hi raha pani mujhe pani mujhe

us ko janun yar mukhlis us ko manun gham gusar

jo pila de ranj mein kulfat ruba pani mujhe

chal paren sansen dharakne lag gain nabz-e-hayat

kya kisi ne de diya angur ka pani mujhe

wo tap-e-gham hai ke sukhe hain lab-o-kam-o-dahan

kash a kar wo pilaen did ka pani mujhe

pi raha hun shauq se ai raz jis ko aj tak

ek din akhir dubo dega wahi pani mujhe