Arooz is now on the App Store, for iPhone and iPad. Download →

All poetry

مدہوشیوں سے کام لیا ہے کبھی کبھی

Raaz Layalpuri (b. 1920)

مدہوشیوں سے کام لیا ہے کبھی کبھی

ہاتھ ان کا ہم نے تھام لیا ہے کبھی کبھی

مے کش بھلا سکیں گے نہ ساقی کا یہ کرم

گرتوں کو اس نے تھام لیا ہے کبھی کبھی

ساقی نے جو پلائی ہماری ہی تھی خرید

ہم سے بھی اس نے دام لیا ہے کبھی کبھی

کیا بات ہے کہ ترک تعلق کے باوجود

ہم نے تمہارا نام لیا ہے کبھی کبھی

اے فرط شوق ہم نے تصور کے فیض سے

نظارہ ان کا عام لیا ہے کبھی کبھی

ٹھکراتا کیسے حسن کی اس پیش کش کو میں

مجبور ہو کے جام لیا ہے کبھی کبھی

دیکھا کبھی نہیں انہیں اے رازؔ بزم میں

جلوہ کنار بام لیا ہے کبھی کبھی