دشوار ہے اب راستا آسان سے آگے

دشوار ہے اب راستا آسان سے آگے

رکھ عمر کہن پچھلا قدم دھیان سے آگے

اٹکا ہوا سورج ہے اسی ایک سبق پر

بڑھتا نہیں دن رات کی گردان سے آگے

قسمت کی خرابی ہے کہ جاتا ہوں غلط سمت

پڑتا ہے بیابان بیابان سے آگے

پہنچا تو نہیں میں در وصلت پہ مگر ہاں

سنتا ہوں کہیں ہے شب ہجران سے آگے

نہ تخت نہ آباد کوئی شہر صبا کا

اک گریہ ہے دیوار سلیمان سے آگے

خمیازہ ہے اس عادت اسراف کا اور بس

جو بے سر و سامانی ہے سامان سے آگے

کل شور بپا دل میں تھا پہچان کی خاطر

اب سکتہ ہے آزار کا پہچان سے آگے

نکلی نہ کسی ایک کی تعبیر موافق

سو خواب تھے ہر خواب پریشان سے آگے

dushwar hai ab rasta asan se age

rakh umr-e-kuhan pichhla qadam dhyan se age

atka hua suraj hai usi ek sabaq par

barhta nahin din rat ki gardan se age

qismat ki kharabi hai ke jata hun ghalat samt

parta hai bayaban bayaban se age

pahuncha to nahin main dar waslat pe magar han

sunta hun kahin hai shab hijran se age

na takht na abad koi shahr saba ka

ik girya hai diwar sulaiman se age

khamyaza hai is adat israf ka aur bas

jo be sar-o-samani hai saman se age

kal shor bapa dil mein tha pahchan ki khatir

ab sakta hai azar ka pahchan se age

nikli na kisi ek ki taabir muafiq

so khwab the har khwab-e-pareshan se age