گلیوں میں بھٹکنا رہ آلام میں رہنا

گلیوں میں بھٹکنا رہ آلام میں رہنا

یاں سب کو ہے ناکامیٔ یک گام میں رہنا

پہلے تو بکھر جانا گزر گاہوں کے ہم راہ

پھر حسرت دیوار و در و بام میں رہنا

باغات میں پھرنا خس و خاشاک پہن کر

ہر سلسلۂ سبز کے انجام میں رہنا

ہر سانس میں گھلنا تری دہلیز کی خوشبو

ہر آنکھ کا دوری کے سیہ دام میں رہنا

آواز نہ آنا کسی آباد مکاں سے

ہر ہاتھ کا یاں دستک ناکام میں رہنا

کچھ دیر میں کھل جائے گا بستی کا نصیبہ

کچھ دیر ہے اور سختیٔ ایام میں رہنا

اعجازؔ بہت دن سے ہے شہرت کا بلاوا

تم ہو کہ وہی قریۂ‌ گم نام میں رہنا

galiyon mein bhatakna rah alam mein rahna

yan sab ko hai nakami-e-yak gam mein rahna

pahle to bikhar jana guzar gahon ke ham rah

phir hasrat diwar-o-dar-o-bam mein rahna

baghat mein phirna khas-o-khashak pahan kar

har silsila-e-sabz ke anjam mein rahna

har sans mein ghulna tiri dahliz ki khushbu

har ankh ka duri ke siyah dam mein rahna

awaz na ana kisi abad makan se

har hath ka yan dastak nakam mein rahna

kuchh der mein khul jaega basti ka nasiba

kuchh der hai aur sakhti-e-ayyam mein rahna

ejaz bahut din se hai shohrat ka bulawa

tum ho ke wahi qarya-e-gum nam mein rahna