نگاہ شوق تجھے کامیاب کس نے کیا

نگاہ شوق تجھے کامیاب کس نے کیا

دل تباہ کو خانہ خراب کس نے کیا

کتاب غم کی کئی لوگ لکھ رہے تھے مگر

ہمارے نام اسے انتساب کس نے کیا

خموش درد کو اظہار کی زباں دے کر

خود اپنے آپ کو یوں بے نقاب کس نے کیا

امید تھی تو محافظ شکستہ کشتی کی

یہ کیا بتائیں اسے زیر آب کس نے کیا

اجارہ داریٔ قلب و نظر کا جھگڑا تھا

دل و نظر میں یہ پیدا حجاب کس نے کیا

سہارا آپ کی جانب سے کچھ نہ کچھ تو ملا

میں اک دعا تھا مجھے مستجاب کس نے کیا

یہ بحث ختم ہی ہو جائے اب تو اچھا ہے

جواب کس کو ملا لا جواب کس نے کیا

وہ شہر جس سے شکایت ہے اب نیا تو نہیں

یہ کس کو ضد تھی اسے انتخاب کس نے کیا

nigah-e-shauq tujhe kamyab kis ne kiya

dil-e-tabah ko khana kharab kis ne kiya

kitab-e-gham ki kai log likh rahe the magar

hamare nam use intisab kis ne kiya

khamosh dard ko izhar ki zaban de kar

khud apne ap ko yun be naqab kis ne kiya

umid thi to muhafiz shikasta kashti ki

ye kya bataen use zer-e-ab kis ne kiya

ijara dari-e-qalb-o-nazar ka jhagra tha

dil-o-nazar mein ye paida hijab kis ne kiya

sahara ap ki janib se kuchh na kuchh to mila

main ik dua tha mujhe mustajab kis ne kiya

ye bahs khatm hi ho jae ab to achchha hai

jawab kis ko mila la jawab kis ne kiya

wo shahr jis se shikayat hai ab naya to nahin

ye kis ko zid thi use intikhab kis ne kiya