جو غم نصیب ہیں کیوں وہ خوشی سے ملتے ہیں

جو غم نصیب ہیں کیوں وہ خوشی سے ملتے ہیں

اندھیرے دیکھیے کب روشنی سے ملتے ہیں

جنون شوق کو صحرا نورد پایا ہے

کچھ اس کے رشتے بھی آوارگی سے ملتے ہیں

خلوص بھی کوئی بنجر زمین ہے شاید

ثبوت اس کے مری زندگی سے ملتے ہیں

وہ بات کہہ دی جسے عقل و دل قبول کریں

یہ دشمنی ہے تو ہم دشمنی سے ملتے ہیں

مقام ہوتے ہیں دل کے قریب بھی لیکن

غرور سے نہیں وہ عاجزی سے ملتے ہیں

پسند خاطر احباب ہوں نہ ہوں لیکن

وہ لوگ بھی ہیں جو سادہ دلی سے ملتے ہیں

امیر لوگوں کو عیش و نشاط کے ساماں

غریب لوگوں کی فاقہ کشی سے ملتے ہیں

خود اپنے آپ سے اکثر ملے ہیں یوں بھی رفیعؔ

کہ جیسے لوگ کسی اجنبی سے ملتے ہیں

jo gham nasib hain kyun wo khushi se milte hain

andhere dekhiye kab raushni se milte hain

junun-e-shauq ko sahra naward paya hai

kuchh us ke rishte bhi awargi se milte hain

khulus bhi koi banjar zamin hai shayad

subut us ke miri zindagi se milte hain

wo bat kah di jise aql-o-dil qubul karen

ye dushmani hai to ham dushmani se milte hain

maqam hote hain dil ke qarib bhi lekin

ghurur se nahin wo ajizi se milte hain

pasand-e-khatir-e-ahbab hun na hun lekin

wo log bhi hain jo sada dili se milte hain

amir logon ko aish-o-nishat ke saman

gharib logon ki faqa kashi se milte hain

khud apne ap se aksar mile hain yun bhi rafi

ke jaise log kisi ajnabi se milte hain