سلوک دوست سے بیزار کیا ہوا ہوں میں

سلوک دوست سے بیزار کیا ہوا ہوں میں

خیال یہ ہے بلندی سے گر گیا ہوں میں

بدلتے وقت نے ہر چیز کو بدل ڈالا

خلوص ویسا کہاں ہے جو سوچتا ہوں میں

مجھے لگا ہے کہ تحلیل ہو گیا ہے وجود

کبھی جب ان کے خیالوں میں کھو گیا ہوں میں

محبتوں کا حسیں دور آنے والا ہے

یہ رخ بھی ان کی عداوت کا دیکھتا ہوں میں

مرے شعور میں ماحول کی ہے بے چینی

نوائے وقت ہوں اک درد کی صدا ہوں میں

شکایتوں میں گنوانے سے اس کو کیا حاصل

ذرا سا وقت ملا ہے تو آ گیا ہوں میں

رہ حیات کے ہر موڑ پر یہ لگتا ہے

فریب کار کی باتوں میں آ گیا ہوں میں

اب اپنی زیست کی تپتی ہوئی سی راہوں پر

کسی درخت کے سائے کو ڈھونڈھتا ہوں میں

مجھے یہ طرز تجاہل عجیب لگتا ہے

وہ کہہ رہے ہیں کہیں آپ سے ملا ہوں میں

suluk-e-dost se bezar kya hua hun main

khayal ye hai bulandi se gir gaya hun main

badalte waqt ne har chiz ko badal dala

khulus waisa kahan hai jo sochta hun main

mujhe laga hai ke tahlil ho gaya hai wajud

kabhi jab un ke khayalon mein kho gaya hun main

mohabbaton ka hasin dur ane wala hai

ye rukh bhi un ki adawat ka dekhta hun main

mire shuur mein mahaul ki hai be chini

nawa-e-waqt hun ik dard ki sada hun main

shikayaton mein ganwane se us ko kya hasil

zara sa waqt mila hai to a gaya hun main

rah-e-hayat ke har mor par ye lagta hai

fareb kar ki baton mein a gaya hun main

ab apni zist ki tapti hui si rahon par

kisi darakht ke sae ko dhundhta hun main

mujhe ye tarz-e-tajahul ajib lagta hai

wo kah rahe hain kahin ap se mila hun main