آ گئی فصل نو بہار دشت میں وہ ہوا چلی

آ گئی فصل نو بہار دشت میں وہ ہوا چلی

سر پہ ہوا جنوں سوار عقل پیادہ پا چلی

باغ سے جب ہوا چلی میکدے سے گھٹا چلی

دل کی کلی کھلا چلی دل کی لگی بجھا چلی

تو نے نہ آ کے دید کی بیٹھ کے گھر میں عید کی

لاش ترے شہید کی جانب کربلا چلی

واہ رے دورۂ شراب خانقہیں ہوئیں خراب

جھوم رہے ہیں شیخ و شاب اب کی عجب ہوا چلی

شور اٹھا جو آہ کا صبر و قرار اڑ چلا

قافلہ میں بجا درا ہونے لگی چلا چلی

ساقی و رند بادہ کش اور پکاریں العطش

آتے ہیں سب کو غش پہ غش آج شراب کیا چلی

قدرؔ یہ فوج جب چڑھی ٹوٹے گی قلب کی گھڑی

ناز بڑھا ادا بڑھی غمزہ چلا حیا چلی

a gai fasl-e-nau bahar dasht mein wo hawa chali

sar pe hua junun sawar aql piyada pa chali

bagh se jab hawa chali maikade se ghata chali

dil ki kali khula chali dil ki lagi bujha chali

tu ne na a ke did ki baith ke ghar mein eid ki

lash tire shahid ki janib-e-karbala chali

wah re daura-e-sharab khanqahen huin kharab

jhum rahe hain shaikh-o-shab ab ki ajab hawa chali

shor utha jo ah ka sabr-o-qarar ur chala

qafila mein baja dara hone lagi chala chali

saqi-o-rind-e-bada kash aur pukaren alatash

ate hain sab ko ghash pe ghash aj sharab kya chali

qadr ye fauj jab charhi tutegi qalb ki ghari

naz barha ada barhi ghamza chala haya chali