وائے قسمت کہ قریب اس نے نہ آنا چاہا

وائے قسمت کہ قریب اس نے نہ آنا چاہا

عمر بھر ہم نے جسے اپنا بنانا چاہا

کیا کہیں اس کو غم دنیا نے کتنا گھیرا

ہم نے جس دل کو ترے غم سے سجانا چاہا

کر دیا اور بھی مدہوش زمانے نے اسے

تیرے دیوانے نے جب ہوش میں آنا چاہا

ہو گئی اور سوا لذت غم کی تاثیر

جب کبھی ہم نے ترے غم کو بھلانا چاہا

وقت کے شعلوں سے محفوظ بھلا کیا رہتے

یوں تو دامن کو بہت ہم نے بچانا چاہا

تیری یادوں کے دیے جلتے رہے جلتے رہے

آندھیوں نے تو کئی بار بجھانا چاہا

بس اسی جرم پہ ناراض ہیں دنیا والے

اپنے خوابوں کا محل ہم نے بنانا چاہا

جو اٹھا اس کو گرانے کی تو سوچی سب نے

جو گرا اس کو نہ دنیا نے اٹھانا چاہا

قصر و ایواں کا گرانا تو کوئی بات نہ تھی

کعبۂ دل کو بھی کچھ لوگوں نے ڈھانا چاہا

جب بھی سوچا کہ حقیقت نہ چھپائیں قادرؔ

ہم سے دنیا نے نیا کوئی بہانا چاہا

wae qismat ke qarib us ne na ana chaha

umr bhar ham ne jise apna banana chaha

kya kahen us ko gham-e-duniya ne kitna ghera

ham ne jis dil ko tire gham se sajana chaha

kar diya aur bhi madhosh zamane ne use

tere diwane ne jab hosh mein ana chaha

ho gai aur siwa lazzat-e-gham ki tasir

jab kabhi ham ne tire gham ko bhulana chaha

waqt ke sholon se mahfuz bhala kya rahte

yun to daman ko bahut ham ne bachana chaha

teri yadon ke diye jalte rahe jalte rahe

andhiyon ne to kai bar bujhana chaha

bas isi jurm pe naraz hain duniya wale

apne khwabon ka mahal ham ne banana chaha

jo utha us ko girane ki to sochi sab ne

jo gira us ko na duniya ne uthana chaha

qasr-o-aiwan ka girana to koi bat na thi

kaaba-e-dil ko bhi kuchh logon ne dhana chaha

jab bhi socha ke haqiqat na chhupaen qadir

ham se duniya ne naya koi bahana chaha