Arooz is now on the App Store, for iPhone and iPad. Download →

All poetry

حق وفاؤں کا جفاؤں سے ادا کرتے ہیں لوگ

Qadir Siddiqi (b. 1923)

حق وفاؤں کا جفاؤں سے ادا کرتے ہیں لوگ

آج کی دنیا کو کیا کہیے کہ کیا کرتے ہیں لوگ

آنکھ پر نم ہونٹ لرزاں دل غموں سے پاش پاش

اس طرح بھی زندگی کا سامنا کرتے ہیں لوگ

اے زمانے کی روش تیری وفا کوشی کی خیر

عہد و پیماں توڑ کر وعدہ وفا کرتے ہیں لوگ

اے وفور زندگی یہ بھی ترا اعجاز ہے

زہر پیتے ہیں مسلسل اور جیا کرتے ہیں لوگ

اتنا اتنا دل میں اٹھتا ہے بغاوت کا غبار

جتنا جتنا دل کو پابند وفا کرتے ہیں لوگ

اس کے پانے کی مسرت چند لمحے بھی نہیں

جس کو کھو کر عمر بھر آہ و بکا کرتے ہیں لوگ

میری روداد الم میں کوئی پہلو ہے ضرور

سن کے روداد الم کیوں ہنس دیا کرتے ہیں لوگ

جب بھی ہوتا ہے جفاؤں کا کہیں بھی تذکرہ

نام جانے کیوں تمہارا لے لیا کرتے ہیں لوگ

صبح نو کی یاد میں کٹتی ہے ہر شام فراق

سکھ کی امیدوں میں اکثر دکھ سہا کرتے ہیں لوگ

رنج و غم عیش و مسرت دھوپ بھی ہے چھاؤں بھی

ہنستے ہنستے زندگی میں رو دیا کرتے ہیں لوگ

کون کام آتا ہے آڑے وقت پر قادرؔ یہ دیکھ

زیست کے ہر موڑ پر یوں تو ملا کرتے ہیں لوگ