ہم پھرے شہر میں آوارہ و رسوا برسوں

ہم پھرے شہر میں آوارہ و رسوا برسوں

دل کے مندر میں ترے وہم کو پوجا برسوں

وہ بدن چاند کے جیسا تھا مرے عکس کے ساتھ

دن کی رونق میں بھی اک خواب سا دیکھا برسوں

قرب نے کھول دئے حسن کے عقدے سارے

زندگی کھاتی رہی عشق کا دھوکا برسوں

اب تو ہنسنے کی اجازت غم دوراں دے دے

وقت رو رو کے بہت ہم نے گزارا برسوں

کوئی ایسا نہ ملا جس سے خبر کچھ ملتی

اپنا حال اپنی ہی تصویر سے پوچھا برسوں

اب نہیں تاب کہ صدمات کی یورش جھیلے

تلخیاں ہوتی رہیں دل کو گوارہ برسوں

یہ الگ بات کہ راس آیا ترا غم ہم کو

ورنہ گھیرے رہا یوں تو غم دنیا برسوں

اس سے پوچھو کہ ہے کیا کیف شکست امید

جس نے جھیلا ہے غم وعدۂ فردا برسوں

ایک معصوم لگاوٹ تھی کہ جس کی خاطر

دل کو مرغوب رہی رنجش بے جا برسوں

تم کہ ہر سانس میں ہر آہ میں ہر خواب میں تھے

پھر بھی ہم اپنے کو پاتے رہے تنہا برسوں

عقل سلجھا نہ سکی الجھے مسائل قادرؔ

آنکھ نے دیکھا ہے قسمت کا تماشہ برسوں

ham phire shahr mein awara-o-ruswa barson

dil ke mandir mein tire wahm ko puja barson

wo badan chand ke jaisa tha mire aks ke sath

din ki raunaq mein bhi ik khwab sa dekha barson

qurb ne khol diye husn ke uqde sare

zindagi khati rahi ishq ka dhoka barson

ab to hansne ki ijazat gham-e-dauran de de

waqt ro ro ke bahut ham ne guzara barson

koi aisa na mila jis se khabar kuchh milti

apna hal apni hi taswir se puchha barson

ab nahin tab ke sadmat ki yurish jhele

talkhiyan hoti rahen dil ko gawara barson

ye alag bat ke ras aya tira gham ham ko

warna ghere raha yun to gham-e-duniya barson

us se puchho ke hai kya kaif-e-shikast-e-ummid

jis ne jhela hai gham-e-waada-e-farda barson

ek maasum lagawat thi ke jis ki khatir

dil ko marghub rahi ranjish-e-be ja barson

tum ke har sans mein har ah mein har khwab mein the

phir bhi ham apne ko pate rahe tanha barson

aql suljha na saki uljhe masail qadir

ankh ne dekha hai qismat ka tamasha barson