غم گناہ سے فکر نجات سے الجھے

غم گناہ سے فکر نجات سے الجھے

تمام عمر ہم افسون ذات سے الجھے

توہمات سے اک جنگ تھی جو جاری رہی

سحاب مرگ نہ ابر حیات سے الجھے

نفس نفس پہ نگاہیں تری بدلتی رہیں

قدم قدم پہ نئے حادثات سے الجھے

تجھے جو مان لیا ہم نے بس وہ مان لیا

زباں صفت پہ نہ کھولی نہ ذات سے الجھے

کبھی خرد سے نپٹنا پڑا کبھی دل سے

تغیرات سے الجھے ثبات سے الجھے

بہت ستایا گزشتہ دنوں کی یادوں نے

یہی نہیں کہ نئے واقعات سے الجھے

تضاد لاکھ رہا پھر بھی زندگی کے لیے

غم انا سے غم کائنات سے الجھے

ہم اس زمانے میں کس کو سنائیں کون سنے

دل و نگاہ کی جن واردات سے الجھے

بساط زیست سجائی تری خوشی کے لیے

نہ جیت سے کبھی الجھے نہ مات سے الجھے

ہمیں نے تیری نگاہ غضب کو جھیلا ہے

ہمیں تری نگہ التفات سے الجھے

gham-e-gunah se fikr-e-najat se uljhe

tamam umr ham afsun zat se uljhe

tawahhumat se ik jang thi jo jari rahi

sahab marg na abr-e-hayat se uljhe

nafas nafas pe nigahen tiri badalti rahen

qadam qadam pe nae hadsat se uljhe

tujhe jo man liya ham ne bas wo man liya

zaban sifat pe na kholi na zat se uljhe

kabhi khirad se nipatna para kabhi dil se

taghayyurat se uljhe sabat se uljhe

bahut sataya guzishta dinon ki yadon ne

yahi nahin ke nae waqiat se uljhe

tazad lakh raha phir bhi zindagi ke liye

gham-e-ana se gham kainat se uljhe

ham is zamane mein kis ko sunaen kaun sune

dil-o-nigah ki jin wardat se uljhe

bisat-e-zist sajai tiri khushi ke liye

na jit se kabhi uljhe na mat se uljhe

hamen ne teri nigah-e-ghazab ko jhela hai

hamen tiri nigah-e-iltifat se uljhe