رہے ہمیشہ مخاطب بس اپنی ذات سے ہم

رہے ہمیشہ مخاطب بس اپنی ذات سے ہم

رجوع ہوتے بھی کیا حسن کائنات سے ہم

اب آ گئی ہے وہ ساعت کہ دن کی بات کریں

ڈرا کریں گے کہاں تک اندھیری رات سے ہم

قدم قدم پہ تو ہم نے ہے ذہن کو گھیرا

قدم قدم پہ بچے گو توہمات سے ہم

خدا کے واسطے اب دام آگہی نہ بچھا

ڈرا کئے ہیں خرد تیری بات بات سے ہم

نہ چھوٹ پائے ہیں اب تک نہ چھوٹ پائیں گے

دل و نگاہ کے رنگیں معاملات سے ہم

کھلیں تو کیسے کھلیں راز ہائے عقل و جنوں

نگاہ پھیرے ہوئے ہیں مشاہدات سے ہم

ہمیں یقیں میں بھی اب شک دکھائی دیتا ہے

گھرے ہوئے ہیں کچھ ایسے ہی واقعات سے ہم

زمانہ لاکھ کرے کوششیں بچانے کی

نکل سکیں گے نہ افسون التفات سے ہم

ہمیں ڈرائیں نہ احباب اب حوادث سے

بنے ہوئے ہیں حقیقت میں حادثات سے ہم

زمانہ اردو ادب کو بھلا نہ پائے گا

بنا رہے ہیں وہ تصویر اپنے ہاتھ سے ہم

زباں تک آ نہیں پائی صدائے دل قادرؔ

بندھے ہوئے ہیں کچھ ایسے تکلفات سے ہم

rahe hamesha mukhatib bas apni zat se ham

ruju hote bhi kya husn-e-kainat se ham

ab a gai hai wo saat ke din ki bat karen

dara karenge kahan tak andheri rat se ham

qadam qadam pe to ham ne hai zehn ko ghera

qadam qadam pe bachche go tawahhumat se ham

khuda ke waste ab dam agahi na bichha

dara kiye hain khirad teri bat bat se ham

na chhut pae hain ab tak na chhut paenge

dil-o-nigah ke rangin muamalat se ham

khulen to kaise khulen raz ha-e-aql-o-junun

nigah phere hue hain mushahadat se ham

hamen yaqin mein bhi ab shak dikhai deta hai

ghire hue hain kuchh aise hi waqiat se ham

zamana lakh kare koshishen bachane ki

nikal sakenge na afsun-e-iltifat se ham

hamen daraen na ahbab ab hawadis se

bane hue hain haqiqat mein hadsat se ham

zamana urdu adab ko bhala na paega

bana rahe hain wo taswir apne hath se ham

zaban tak a nahin pai sada-e-dil qadir

bandhe hue hain kuchh aise takallufat se ham