دست جنوں میں دامن گل کو لانے کی تدبیر کریں

دست جنوں میں دامن گل کو لانے کی تدبیر کریں

نرم ہوا کے جھونکو آؤ موسم کو زنجیر کریں

موسم ابر و باد سے پوچھیں لذت سوزاں کا مفہوم

موجۂ خوں سے دامن گل پر حرف جنوں تحریر کریں

آمد گل کا ویرانی بھی دیکھ رہی ہے کیا کیا خواب

ویرانی کے خواب کو آؤ وحشت سے تعبیر کریں

رات کے جاگے صبح کی ہلکی نرم ہوا میں سوئے ہیں

دیکھیں کب تک نیند کے ماتے اٹھنے میں تاخیر کریں

تنہائی میں کاہش جاں کے ہاتھوں کس آرام سے ہیں

کیسے اپنے ناز اٹھائیں کیا اپنی تحقیر کریں

بیتابی تو خیر رہے گی بیتابی کی بات نہیں

مرنا اتنا سہل نہیں ہے جینے کی تدبیر کریں

گھوم رہے ہیں دشت جنوں میں ان کے کیا کیا روپ جمیلؔ

کس کو دیکھیں کس کو چھوڑیں کس کو جا کے اسیر کریں

dast-e-junun mein daman gul ko lane ki tadbir karen

narm hawa ke jhonko ao mausam ko zanjir karen

mausam abr-o-bad se puchhen lazzat sozan ka mafhum

mauja-e-khun se daman gul par harf junun tahrir karen

amad gul ka wirani bhi dekh rahi hai kya kya khwab

wirani ke khwab ko ao wahshat se taabir karen

rat ke jage subh ki halki narm hawa mein soe hain

dekhen kab tak nind ke mate uthne mein takhir karen

tanhai mein kahish jan ke hathon kis aram se hain

kaise apne naz uthaen kya apni tahqir karen

betabi to khair rahegi betabi ki bat nahin

marna itna sahl nahin hai jine ki tadbir karen

ghum rahe hain dasht-e-junun mein un ke kya kya rup jamil

kis ko dekhen kis ko chhoren kis ko ja ke asir karen