دکھاتا کیا ہے یہ ٹوٹی ہوئی کمان مجھے

دکھاتا کیا ہے یہ ٹوٹی ہوئی کمان مجھے

ترا شکار ہوں اچھی طرح سے جان مجھے

ہوا نے ریت کی صورت زمیں پہ لکھ دی ہے

دکھائی دیتی ہے پتھر کی داستان مجھے

اک آسماں نے زمیں پر گرا دیا لیکن

زمیں نے پھر سے بنا ڈالا آسمان مجھے

میں اس ہوا کا نہیں پانیوں کا قیدی ہوں

نہ جانے کیوں لئے پھرتا ہے بادبان مجھے

زمیں سے صرف جزیرہ دکھائی دیتا ہے

کوئی نہ جان سکا آج تک چٹان مجھے

نہ جانے تیر کی مانند کیسے چبھنے لگا

وہ شخص لگتا تھا ٹوٹی ہوئی کمان مجھے

dikhata kya hai ye tuti hui kaman mujhe

tira shikar hun achchhi tarah se jan mujhe

hawa ne ret ki surat zamin pe likh di hai

dikhai deti hai patthar ki dastan mujhe

ik asman ne zamin par gira diya lekin

zamin ne phir se bana dala asman mujhe

main is hawa ka nahin paniyon ka qaidi hun

na jane kyun liye phirta hai badban mujhe

zamin se sirf jazira dikhai deta hai

koi na jan saka aj tak chatan mujhe

na jane tir ki manind kaise chubhne laga

wo shakhs lagta tha tuti hui kaman mujhe