ہم کہ مجنوں کو دعا کہتے ہیں

ہم کہ مجنوں کو دعا کہتے ہیں

روئے لیلیٰ کو صبا کہتے ہیں

کتنی افسردہ ہے یہ شام بہار

جس کو ہم تازہ ہوا کہتے ہیں

اپنی آنکھوں میں نہ جانے کب کا

خواب ہے جس کو خدا کہتے ہیں

پھول میں اس کا لہو بہتا ہے

چاند کو اس کی قبا کہتے ہیں

انہی خوباں کی ہتھیلی پہ رہو

اس لئے تم کو حنا کہتے ہیں

ہم وہ پابند وفا ہیں کہ تجھے

اب بھی بے مہر و وفا کہتے ہیں

شعر کہتے ہیں غزل کے یعنی

خواب کو خواب نما کہتے ہیں

ham ke majnun ko dua kahte hain

ru-e-laila ko saba kahte hain

kitni afsurda hai ye sham-e-bahar

jis ko ham taza hua kahte hain

apni ankhon mein na jane kab ka

khwab hai jis ko khuda kahte hain

phul mein us ka lahu bahta hai

chand ko us ki qaba kahte hain

unhi khuban ki hatheli pe raho

is liye tum ko hina kahte hain

ham wo paband-e-wafa hain ke tujhe

ab bhi be mehr-o-wafa kahte hain

sher kahte hain ghazal ke yaani

khwab ko khwab numa kahte hain