کمال ضبط کو خود بھی تو آزماؤں گی

کمال ضبط کو خود بھی تو آزماؤں گی

میں اپنے ہاتھ سے اس کی دلہن سجاؤں گی

سپرد کر کے اسے چاندنی کے ہاتھوں میں

میں اپنے گھر کے اندھیروں کو لوٹ آؤں گی

بدن کے کرب کو وہ بھی سمجھ نہ پائے گا

میں دل میں روؤں گی آنکھوں میں مسکراؤں گی

وہ کیا گیا کہ رفاقت کے سارے لطف گئے

میں کس سے روٹھ سکوں گی کسے مناؤں گی

اب اس کا فن تو کسی اور سے ہوا منسوب

میں کس کی نظم اکیلے میں گنگناؤں گی

وہ ایک رشتۂ بے نام بھی نہیں لیکن

میں اب بھی اس کے اشاروں پہ سر جھکاؤں گی

بچھا دیا تھا گلابوں کے ساتھ اپنا وجود

وہ سو کے اٹھے تو خوابوں کی راکھ اٹھاؤں گی

سماعتوں میں گھنے جنگلوں کی سانسیں ہیں

میں اب کبھی تری آواز سن نہ پاؤں گی

جواز ڈھونڈ رہا تھا نئی محبت کا

وہ کہہ رہا تھا کہ میں اس کو بھول جاؤں گی

kamal-e-zabt ko khud bhi to azmaungi

main apne hath se us ki dulhan sajaungi

supurd kar ke use chandni ke hathon mein

main apne ghar ke andheron ko laut aungi

badan ke karb ko wo bhi samajh na paega

main dil mein roungi ankhon mein muskuraungi

wo kya gaya ke rifaqat ke sare lutf gae

main kis se ruth sakungi kise manaungi

ab us ka fan to kisi aur se hua mansub

main kis ki nazm akele mein gungunaungi

wo ek rishta-e-be nam bhi nahin lekin

main ab bhi us ke isharon pe sar jhukaungi

bichha diya tha gulabon ke sath apna wajud

wo so ke uthe to khwabon ki rakh uthaungi

samaaton mein ghane jangalon ki sansen hain

main ab kabhi tiri awaz sun na paungi

jawaz dhund raha tha nai mohabbat ka

wo kah raha tha ke main us ko bhul jaungi