مرے قریب ہی مہتاب دیکھ سکتا تھا

مرے قریب ہی مہتاب دیکھ سکتا تھا

گئے دنوں میں یہ تالاب دیکھ سکتا تھا

اک ایسے وقت میں سب پیڑ میں نے نقل کیے

جہاں پہ میں انہیں شاداب دیکھ سکتا تھا

زیادہ دیر اسی ناؤ میں ٹھہرنے سے

میں اپنے آپ کو غرقاب دیکھ سکتا تھا

کوئی بھی دل میں ذرا جم کے خاک اڑاتا تو

ہزار گوہر نایاب دیکھ سکتا تھا

کہانیوں نے مری عادتیں بگاڑ دی تھیں

میں صرف سچ کو ظفر یاب دیکھ سکتا تھا

مگر وہ شہر کہانی میں رہ گیا ہے دوست!

جہاں میں رہ کے ترے خواب دیکھ سکتا تھا

mire qarib hi mahtab dekh sakta tha

gae dinon mein ye talab dekh sakta tha

ik aise waqt mein sab per main ne naql kiye

jahan pe main unhen shadab dekh sakta tha

ziyada der isi nao mein thaharne se

main apne ap ko gharqab dekh sakta tha

koi bhi dil mein zara jam ke khak urata to

hazar gauhar-e-nayab dekh sakta tha

kahaniyon ne miri adaten bigar di thin

main sirf sach ko zafar yab dekh sakta tha

magar wo shahr kahani mein rah gaya hai dost!

jahan mein rah ke tire khwab dekh sakta tha