کو بہ کو پھیل گئی بات شناسائی کی
Parveen Shakir (1952–1994)کو بہ کو پھیل گئی بات شناسائی کی
اس نے خوشبو کی طرح میری پذیرائی کی
کیسے کہہ دوں کہ مجھے چھوڑ دیا ہے اس نے
بات تو سچ ہے مگر بات ہے رسوائی کی
وہ کہیں بھی گیا لوٹا تو مرے پاس آیا
بس یہی بات ہے اچھی مرے ہرجائی کی
تیرا پہلو ترے دل کی طرح آباد رہے
تجھ پہ گزرے نہ قیامت شب تنہائی کی
اس نے جلتی ہوئی پیشانی پہ جب ہاتھ رکھا
روح تک آ گئی تاثیر مسیحائی کی
اب بھی برسات کی راتوں میں بدن ٹوٹتا ہے
جاگ اٹھتی ہیں عجب خواہشیں انگڑائی کی
ku ba ku phail gai bat shanasai ki
us ne khushbu ki tarah meri pazirai ki
kaise kah dun ke mujhe chhor diya hai us ne
bat to sach hai magar bat hai ruswai ki
wo kahin bhi gaya lauta to mire pas aya
bas yahi bat hai achchhi mire harjai ki
tera pahlu tire dil ki tarah abad rahe
tujh pe guzre na qayamat shab-e-tanhai ki
us ne jalti hui peshani pe jab hath rakha
ruh tak a gai tasir masihai ki
ab bhi barsat ki raton mein badan tutta hai
jag uthti hain ajab khwahishen angrai ki