شام آئی تری یادوں کے ستارے نکلے

شام آئی تری یادوں کے ستارے نکلے

رنگ ہی غم کے نہیں نقش بھی پیارے نکلے

ایک موہوم تمنا کے سہارے نکلے

چاند کے ساتھ ترے ہجر کے مارے نکلے

کوئی موسم ہو مگر شان خم و پیچ وہی

رات کی طرح کوئی زلف سنوارے نکلے

رقص جن کا ہمیں ساحل سے بہا لایا تھا

وہ بھنور آنکھ تک آئے تو کنارے نکلے

وہ تو جاں لے کے بھی ویسا ہی سبک نام رہا

عشق کے باب میں سب جرم ہمارے نکلے

عشق دریا ہے جو تیرے وہ تہی دست رہے

وہ جو ڈوبے تھے کسی اور کنارے نکلے

دھوپ کی رت میں کوئی چھاؤں اگاتا کیسے

شاخ پھوٹی تھی کہ ہم سایوں میں آرے نکلے

sham ai tiri yadon ke sitare nikle

rang hi gham ke nahin naqsh bhi pyare nikle

ek mauhum tamanna ke sahare nikle

chand ke sath tire hijr ke mare nikle

koi mausam ho magar shan kham-o-pech wahi

rat ki tarah koi zulf sanware nikle

raqs jin ka hamen sahil se baha laya tha

wo bhanwar ankh tak ae to kinare nikle

wo to jan le ke bhi waisa hi subuk nam raha

ishq ke bab mein sab jurm hamare nikle

ishq dariya hai jo tere wo tahi dast rahe

wo jo dube the kisi aur kinare nikle

dhup ki rut mein koi chhaon ugata kaise

shakh phuti thi ke ham sayon mein are nikle