چارہ سازوں کی اذیت نہیں دیکھی جاتی

چارہ سازوں کی اذیت نہیں دیکھی جاتی

تیرے بیمار کی حالت نہیں دیکھی جاتی

دینے والے کی مشیت پہ ہے سب کچھ موقوف

مانگنے والے کی حاجت نہیں دیکھی جاتی

دن بہل جاتا ہے لیکن ترے دیوانوں کی

شام ہوتی ہے تو وحشت نہیں دیکھی جاتی

تمکنت سے تجھے رخصت تو کیا ہے لیکن

ہم سے ان آنکھوں کی حسرت نہیں دیکھی جاتی

کون اترا ہے یہ آفاق کی پہنائی میں

آئنہ خانے کی حیرت نہیں دیکھی جاتی

chara sazon ki aziyyat nahin dekhi jati

tere bimar ki halat nahin dekhi jati

dene wale ki mashiyyat pe hai sab kuchh mauquf

mangne wale ki hajat nahin dekhi jati

din bahal jata hai lekin tire diwanon ki

sham hoti hai to wahshat nahin dekhi jati

tamkanat se tujhe rukhsat to kya hai lekin

ham se in ankhon ki hasrat nahin dekhi jati

kaun utra hai ye afaq ki pahnai mein

aina khane ki hairat nahin dekhi jati