قید میں گزرے گی جو عمر بڑے کام کی تھی

قید میں گزرے گی جو عمر بڑے کام کی تھی

پر میں کیا کرتی کہ زنجیر ترے نام کی تھی

جس کے ماتھے پہ مرے بخت کا تارہ چمکا

چاند کے ڈوبنے کی بات اسی شام کی تھی

میں نے ہاتھوں کو ہی پتوار بنایا ورنہ

ایک ٹوٹی ہوئی کشتی مرے کس کام کی تھی

وہ کہانی کہ ابھی سوئیاں نکلیں بھی نہ تھیں

فکر ہر شخص کو شہزادی کے انجام کی تھی

یہ ہوا کیسے اڑا لے گئی آنچل میرا

یوں ستانے کی تو عادت مرے گھنشیام کی تھی

بوجھ اٹھاتے ہوئے پھرتی ہے ہمارا اب تک

اے زمیں ماں تری یہ عمر تو آرام کی تھی

qaid mein guzregi jo umr bare kam ki thi

par main kya karti ke zanjir tire nam ki thi

jis ke mathe pe mire bakht ka tara chamka

chand ke dubne ki bat usi sham ki thi

main ne hathon ko hi patwar banaya warna

ek tuti hui kashti mire kis kam ki thi

wo kahani ke abhi suiyan niklen bhi na thin

fikr har shakhs ko shahzadi ke anjam ki thi

ye hua kaise ura le gai anchal mera

yun satane ki to adat mire ghanshayam ki thi

bojh uthate hue phirti hai hamara ab tak

ai zamin man tiri ye umr to aram ki thi