شوق رقص سے جب تک انگلیاں نہیں کھلتیں

شوق رقص سے جب تک انگلیاں نہیں کھلتیں

پاؤں سے ہواؤں کے بیڑیاں نہیں کھلتیں

پیڑ کو دعا دے کر کٹ گئی بہاروں سے

پھول اتنے بڑھ آئے کھڑکیاں نہیں کھلتیں

پھول بن کے سیروں میں اور کون شامل تھا

شوخی صبا سے تو بالیاں نہیں کھلتیں

حسن کے سمجھنے کو عمر چاہئے جاناں

دو گھڑی کی چاہت میں لڑکیاں نہیں کھلتیں

کوئی موجۂ شیریں چوم کر جگائے گی

سورجوں کے نیزوں سے سیپیاں نہیں کھلتیں

ماں سے کیا کہیں گی دکھ ہجر کا کہ خود پر بھی

اتنی چھوٹی عمروں کی بچیاں نہیں کھلتیں

شاخ شاخ سرگرداں کس کی جستجو میں ہیں

کون سے سفر میں ہیں تتلیاں نہیں کھلتیں

آدھی رات کی چپ میں کس کی چاپ ابھرتی ہے

چھت پہ کون آتا ہے سیڑھیاں نہیں کھلتیں

پانیوں کے چڑھنے تک حال کہہ سکیں اور پھر

کیا قیامتیں گزریں بستیاں نہیں کھلتیں

shauq raqs se jab tak ungliyan nahin khultin

paon se hawaon ke beriyan nahin khultin

per ko dua de kar kat gai baharon se

phul itne barh ae khirkiyan nahin khultin

phul ban ke sairon mein aur kaun shamil tha

shokhi-e-saba se to baliyan nahin khultin

husn ke samajhne ko umr chahiye janan

do ghari ki chahat mein larkiyan nahin khultin

koi mauja-e-shirin chum kar jagaegi

surajon ke nezon se sipiyan nahin khultin

man se kya kahengi dukh hijr ka ke khud par bhi

itni chhoti umron ki bachchiyan nahin khultin

shakh shakh-e-sargardan kis ki justuju mein hain

kaun se safar mein hain titliyan nahin khultin

adhi rat ki chup mein kis ki chap ubharti hai

chhat pe kaun ata hai sirhiyan nahin khultin

paniyon ke charhne tak hal kah saken aur phir

kya qayamaten guzren bastiyan nahin khultin