دھنک دھنک مری پوروں کے خواب کر دے گا

دھنک دھنک مری پوروں کے خواب کر دے گا

وہ لمس میرے بدن کو گلاب کر دے گا

قبائے جسم کے ہر تار سے گزرتا ہوا

کرن کا پیار مجھے آفتاب کر دے گا

جنوں پسند ہے دل اور تجھ تک آنے میں

بدن کو ناؤ لہو کو چناب کر دے گا

میں سچ کہوں گی مگر پھر بھی ہار جاؤں گی

وہ جھوٹ بولے گا اور لا جواب کر دے گا

انا پرست ہے اتنا کہ بات سے پہلے

وہ اٹھ کے بند مری ہر کتاب کر دے گا

سکوت شہر سخن میں وہ پھول سا لہجہ

سماعتوں کی فضا خواب خواب کر دے گا

اسی طرح سے اگر چاہتا رہا پیہم

سخن وری میں مجھے انتخاب کر دے گا

مری طرح سے کوئی ہے جو زندگی اپنی

تمہاری یاد کے نام انتساب کر دے گا

dhanak dhanak miri poron ke khwab kar dega

wo lams mere badan ko gulab kar dega

qaba-e-jism ke har tar se guzarta hua

kiran ka pyar mujhe aftab kar dega

junun pasand hai dil aur tujh tak ane mein

badan ko nao lahu ko chunab kar dega

main sach kahungi magar phir bhi har jaungi

wo jhut bolega aur la jawab kar dega

ana parast hai itna ke bat se pahle

wo uth ke band miri har kitab kar dega

sukut-e-shahr-e-sukhan mein wo phul sa lahja

samaaton ki faza khwab khwab kar dega

isi tarah se agar chahta raha paiham

sukhan wari mein mujhe intikhab kar dega

miri tarah se koi hai jo zindagi apni

tumhari yad ke nam intisab kar dega