ہم نے ہی لوٹنے کا ارادہ نہیں کیا
Parveen Shakir (1952–1994)ہم نے ہی لوٹنے کا ارادہ نہیں کیا
اس نے بھی بھول جانے کا وعدہ نہیں کیا
دکھ اوڑھتے نہیں کبھی بزم طرب میں ہم
ملبوس دل کو تن کا لبادہ نہیں کیا
جو غم ملا ہے بوجھ اٹھایا ہے اس کا خود
سر زیر بار ساغر و بادہ نہیں کیا
کار جہاں ہمیں بھی بہت تھے سفر کی شام
اس نے بھی التفات زیادہ نہیں کیا
آمد پہ تیری عطر و چراغ و سبو نہ ہوں
اتنا بھی بود و باش کو سادہ نہیں کیا
ham ne hi lautne ka irada nahin kiya
us ne bhi bhul jane ka waada nahin kiya
dukh orhte nahin kabhi bazm-e-tarab mein ham
malbus dil ko tan ka labada nahin kiya
jo gham mila hai bojh uthaya hai us ka khud
sar zer bar saghar-o-bada nahin kiya
kar-e-jahan hamen bhi bahut the safar ki sham
us ne bhi iltifat ziyada nahin kiya
amad pe teri itr-o-charagh-o-subu na hun
itna bhi bud-o-bash ko sada nahin kiya