گئے موسم میں جو کھلتے تھے گلابوں کی طرح

گئے موسم میں جو کھلتے تھے گلابوں کی طرح

دل پہ اتریں گے وہی خواب عذابوں کی طرح

راکھ کے ڈھیر پہ اب رات بسر کرنی ہے

جل چکے ہیں مرے خیمے مرے خوابوں کی طرح

ساعت دید کہ عارض ہیں گلابی اب تک

اولیں لمحوں کے گلنار حجابوں کی طرح

وہ سمندر ہے تو پھر روح کو شاداب کرے

تشنگی کیوں مجھے دیتا ہے سرابوں کی طرح

غیر ممکن ہے ترے گھر کے گلابوں کا شمار

میرے رستے ہوئے زخموں کے حسابوں کی طرح

یاد تو ہوں گی وہ باتیں تجھے اب بھی لیکن

شیلف میں رکھی ہوئی بند کتابوں کی طرح

کون جانے کہ نئے سال میں تو کس کو پڑھے

تیرا معیار بدلتا ہے نصابوں کی طرح

شوخ ہو جاتی ہے اب بھی تری آنکھوں کی چمک

گاہے گاہے ترے دلچسپ جوابوں کی طرح

ہجر کی شب مری تنہائی پہ دستک دے گی

تیری خوش بو مرے کھوئے ہوئے خوابوں کی طرح

gae mausam mein jo khulte the gulabon ki tarah

dil pe utrenge wahi khwab azabon ki tarah

rakh ke dher pe ab rat basar karni hai

jal chuke hain mire kheme mire khwabon ki tarah

saat-e-did ke ariz hain gulabi ab tak

awwalin lamhon ke gulnar hijabon ki tarah

wo samundar hai to phir ruh ko shadab kare

tishnagi kyun mujhe deta hai sarabon ki tarah

ghair mumkin hai tire ghar ke gulabon ka shumar

mere raste hue zakhmon ke hisabon ki tarah

yad to hongi wo baten tujhe ab bhi lekin

shelf mein rakhi hui band kitabon ki tarah

kaun jane ke nae sal mein to kis ko parhe

tera meyar badalta hai nisabon ki tarah

shokh ho jati hai ab bhi tiri ankhon ki chamak

gahe gahe tire dilchasp jawabon ki tarah

hijr ki shab miri tanhai pe dastak degi

teri khush bu mire khoe hue khwabon ki tarah