حسن کی اک چنگاری نے کیا خوب لگائی عشق کی آگ

حسن کی اک چنگاری نے کیا خوب لگائی عشق کی آگ

رخ پر زلف کا جھونکا آیا اور لہرائی عشق کی آگ

آنکھ سے نکلی اک دستک نے دل دروازہ کھول دیا

پیار کا اک گلدستہ تھامے ملنے آئی عشق کی آگ

ساتھ میں جینا ساتھ میں مرنا رشتہ اپنی صدیوں کا

ہمجولی ہو اپنی جیسے یا ماں جائی عشق کی آگ

پیر میں چکر ہاتھ میں کاسہ دل والوں کی بستی میں

پیار کی دولت لینے نکلے ہاتھ میں آئی عشق کی آگ

ہجر کے تپتے صحرا میں اک یاد کے گھونٹ سے دم آیا

بالکل جان نکلنے کو تھی جب پہنچائی عشق کی آگ

اس ظالم کی نظروں میں کچھ جادو جیسی بات تو تھی

پہلے پیار کا روپ سجایا پھر سلگائی عشق کی آگ

ہجر کے ہاتھوں دل کی زمیں پر ناگ پھنی جب کاشت ہوئے

ہم نے یاد کی کلیاں سونگھیں اور مہکائی عشق کی آگ

دنیا بھر کی نہریں دریا اور سمندر سوکھ گئے

سوہنی اپنے کچے گھڑے میں جب بھر لائی عشق کی آگ

یوں تو صباؔ ہم ہر موسم میں آگ میں زندہ جلتے ہیں

ساون کی رت نے لیکن کھل کر برسائی عشق کی آگ

husn ki ik chingari ne kya khub lagai ishq ki ag

rukh par zulf ka jhonka aya aur lahrai ishq ki ag

ankh se nikli ik dastak ne dil darwaza khol diya

pyar ka ik guldasta thame milne ai ishq ki ag

sath mein jina sath mein marna rishta apni sadiyon ka

hamjuli ho apni jaise ya man jai ishq ki ag

pir mein chakkar hath mein kasa dil walon ki basti mein

pyar ki daulat lene nikle hath mein ai ishq ki ag

hijr ke tapte sahra mein ik yad ke ghunt se dam aya

bilkul jan nikalne ko thi jab pahunchai ishq ki ag

us zalim ki nazron mein kuchh jadu jaisi bat to thi

pahle pyar ka rup sajaya phir silgai ishq ki ag

hijr ke hathon dil ki zamin par nag phanni jab kasht hue

ham ne yad ki kaliyan sunghen aur mahkai ishq ki ag

duniya bhar ki nahren dariya aur samundar sukh gae

sohani apne kachche ghare mein jab bhar lai ishq ki ag

yun to saba ham har mausam mein ag mein zinda jalte hain

sawan ki rut ne lekin khul kar barsai ishq ki ag