جب وہ مرے اثبات سے انکار کو سمجھا

جب وہ مرے اثبات سے انکار کو سمجھا

تب ہی تو حقیقت میں مرے پیار کو سمجھا

جب ختم تماشہ ہوا تالی تو بجی خوب

لیکن نہ کوئی مرکزی کردار کو سمجھا

جس وقت عدالت نے بری کر دئیے قاتل

تب ذہن رسا نعرۂ دیوار کو سمجھا

روٹی بھی کھلائی تو مجھے کاسہ بکف نے

باقی نہ کوئی بھوک کی گفتار کو سمجھا

یہ روند کے آگے ہی چلی جاتی ہے سب کو

گر آپ نے دنیا کی نہ رفتار کو سمجھا

وہ دوسری دنیا کا مکیں ہو گیا جا کر

جب تک کہ مسیحا مرے بیمار کو سمجھا

کر دی لب و رخسار کی لالی نظر انداز

تب جا کے کہیں حسن کے معیار کو سمجھا

دی داد بہت کھل کے مجھے اہل سخن نے

لیکن نہ صباؔ آپ کے اشعار کو سمجھا

jab wo mire isbat se inkar ko samjha

tab hi to haqiqat mein mire pyar ko samjha

jab khatm tamasha hua tali to baji khub

lekin na koi markazi kirdar ko samjha

jis waqt-e-adalat ne buri kar diye qatil

tab zehn-e-rasa naara-e-diwar ko samjha

roti bhi khilai to mujhe kasa bakaf ne

baqi na koi bhuk ki guftar ko samjha

ye raund ke age hi chali jati hai sab ko

gar ap ne duniya ki na raftar ko samjha

wo dusri duniya ka makin ho gaya ja kar

jab tak ke masiha mire bimar ko samjha

kar di lab-o-rukhsar ki lali nazar andaz

tab ja ke kahin husn ke meyar ko samjha

di dad bahut khul ke mujhe ahl-e-sukhan ne

lekin na saba ap ke ashar ko samjha