جیت بھی جائیں گے آمادۂ پیکار تو ہوں

جیت بھی جائیں گے آمادۂ پیکار تو ہوں

ہم الجھنے کے لئے وقت سے تیار تو ہوں

خود شناسی تو چلو ٹھہری بہت دور کی بات

اپنے کردار سے ہم لوگ خبردار تو ہوں

مقصد زیست ذرا تو ہی صدا دے ان کو

تجھ سے ہو کے جو الگ ہوتے ہیں بیدار تو ہوں

دھوپ اب تک تو منڈیروں پہ چڑھی بیٹھی ہے

اس کے آنگن میں اتر آنے کے آثار تو ہوں

ایسا مشکل تو نہیں توڑ کے تارے لانا

آسماں پر شب فرقت میں نمودار تو ہوں

پس منظر بھی بہت کچھ ہے مگر ہم نظریں

ان نظاروں سے ہٹا لینے کو تیار تو ہوں

موت کہتے ہیں ہر اک دکھ کی دوا ہے راحتؔ

مر کے بھی دیکھیں گے ہم جینے سے بیزار تو ہوں

jit bhi jaenge amada-e-paikar to hun

ham ulajhne ke liye waqt se tayyar to hun

khud shanasi to chalo thahri bahut dur ki bat

apne kirdar se ham log khabardar to hun

maqsad-e-zist zara tu hi sada de un ko

tujh se ho ke jo alag hote hain bedar to hun

dhup ab tak to munderon pe charhi baithi hai

us ke angan mein utar ane ke asar to hun

aisa mushkil to nahin tor ke tare lana

asman par shab-e-furqat mein numudar to hun

pas manzar bhi bahut kuchh hai magar ham nazren

in nazaron se hata lene ko tayyar to hun

maut kahte hain har ik dukh ki dawa hai rahat

mar ke bhi dekhenge ham jine se bezar to hun