اسے خلاؤں کی وسعتوں کا تجربہ ہی نہیں

اسے خلاؤں کی وسعتوں کا تجربہ ہی نہیں

وہ میرے ساتھ کبھی عرش تک گیا ہی نہیں

میں اس کو اور ہی عالم میں لے گیا ہوتا

زمانہ انگلی پکڑ کر مری چلا ہی نہیں

ہر ایک چہرے پہ کتنی عبارتیں ہیں رقم

مری جبیں پہ تو کچھ وقت نے لکھا ہی نہیں

بلا کشان محبت میں ہے شمار مرا

یہ انکشاف تو مجھ پر کبھی ہوا ہی نہیں

بنام جام و سبو اس کو روکنا چاہا

تھا وقت مجھ سے بھی چالاک وہ رکا ہی نہیں

قصور اس کا نہیں ہے قصور میرا ہے

میں کم نصیبی کی تہہ تک کبھی گیا ہی نہیں

اک آس ذہن کے کونے میں ہے ابھی محفوظ

یہ اور کھلونا ہے راحتؔ جو ٹوٹتا ہی نہیں

use khalaon ki wusaton ka tajriba hi nahin

wo mere sath kabhi arsh tak gaya hi nahin

main us ko aur hi alam mein le gaya hota

zamana ungli pakar kar miri chala hi nahin

har ek chehre pe kitni ibaraten hain raqam

miri jabin pe to kuchh waqt ne likha hi nahin

bala kashin mohabbat mein hai shumar mira

ye inkishaf to mujh par kabhi hua hi nahin

banam jam-o-subu us ko rokna chaha

tha waqt mujh se bhi chalak wo ruka hi nahin

qusur us ka nahin hai qusur mera hai

main kam nasibi ki tah tak kabhi gaya hi nahin

ik as zehn ke kone mein hai abhi mahfuz

ye aur khilauna hai rahat jo tutta hi nahin