خود ہی یہ درد سر قبول کیا

خود ہی یہ درد سر قبول کیا

ہر عذاب سفر قبول کیا

کون ہے جس کی کھوج میں ہم نے

گھومنا در بدر قبول کیا

نہ تو میں ہی کہوں نہ دل میرا

کس نے کس کا اثر قبول کیا

گھومنا کوچۂ ملامت میں

ہم نے کیا سوچ کر قبول کیا

ہم نے دو دن کی زندگی کے لیے

کتنا لمبا سفر قبول کیا

معنیٔ زیست ہی بدل دیں گے

ہم نے جینا اگر قبول کیا

دید کی چاہ میں ان آنکھوں نے

ہر فریب نظر قبول کیا

اس عبادت کے فرض کو راحتؔ

من نہیں تھا مگر قبول کیا

khud hi ye dard-e-sar qubul kiya

har azab-e-safar qubul kiya

kaun hai jis ki khoj mein ham ne

ghumna dar badar qubul kiya

na to main hi kahun na dil mera

kis ne kis ka asar qubul kiya

ghumna kucha-e-malamat mein

ham ne kya soch kar qubul kiya

ham ne do din ki zindagi ke liye

kitna lamba safar qubul kiya

maani-e-zist hi badal denge

ham ne jina agar qubul kiya

did ki chah mein in ankhon ne

har fareb-e-nazar qubul kiya

is ibadat ke farz ko rahat

man nahin tha magar qubul kiya