سمجھ کے سارے سہاروں کو رائیگاں ہم نے

سمجھ کے سارے سہاروں کو رائیگاں ہم نے

اتار پھینکا ہے کشتی کا بادباں ہم نے

یہ کم ثبوت ہے محشر میں بے گناہی کا

کہ اپنے ہونٹوں پہ پھیری نہیں زباں ہم نے

جو بات چھیڑی ہے ہم نے ہمیں بھی علم نہیں

کہ ختم کرنا ہے اس بات کو کہاں ہم نے

دبے دبے ہیں ازل سے اسی لیے ہم لوگ

اٹھائے رکھا ہے کاندھوں پہ آسماں ہم نے

انڈیل لی ہے جہنم کی آگ سینے میں

رگوں میں بھر لیا دوزخ کا سب دھواں ہم نے

فقط گلوں کو نہیں نظم گلستاں سے گلہ

سنا ہے غور سے کانٹوں کا بھی بیاں ہم نے

ہم ایک دوجے سے ڈرتے ہیں اس لیے راحتؔ

رکھا ہے جنت و دوزخ کو درمیاں ہم نے

samajh ke sare saharon ko raigan ham ne

utar phenka hai kashti ka badban ham ne

ye kam subut hai mahshar mein be gunahi ka

ke apne honton pe pheri nahin zaban ham ne

jo bat chheri hai ham ne hamen bhi ilm nahin

ke khatm karna hai is bat ko kahan ham ne

dabe dabe hain azal se isi liye ham log

uthae rakha hai kandhon pe asman ham ne

undel li hai jahannam ki ag sine mein

ragon mein bhar liya dozakh ka sab dhuan ham ne

faqat gulon ko nahin nazm-e-gulsitan se gila

suna hai ghaur se kanton ka bhi bayan ham ne

ham ek duje se darte hain is liye rahat

rakha hai jannat-o-dozakh ko darmiyan ham ne