رونا زار و قطار چھوڑ دیا

رونا زار و قطار چھوڑ دیا

ہم نے یہ کاروبار چھوڑ دیا

جس پہ نقش قدم تھے مجنوں کے

ہم نے وہ خار زار چھوڑ دیا

ہم نے تارے تو گن لیے لیکن

آنسوؤں کا شمار چھوڑ دیا

ساتھ امید ہی کا میں نے تو

تھا بہت خوش گوار چھوڑ دیا

جو بھروسہ تھا سوچ پر مجھ کو

وہ بھی پروردگار چھوڑ دیا

ہم نے تو آسرا خدا کا بھی

جو کہ تھا پائیدار چھوڑ دیا

بے وفا جب لگی مجھے میں نے

زندگی ہی سے پیار چھوڑ دیا

میں نے تو شغل شاعری راحتؔ

جب ہوا دل پہ بار چھوڑ دیا

rona zar-o-qatar chhor diya

ham ne ye karobar chhor diya

jis pe naqsh-e-qadam the majnun ke

ham ne wo khar zar chhor diya

ham ne tare to gin liye lekin

ansuon ka shumar chhor diya

sath ummid hi ka main ne to

tha bahut khush gawar chhor diya

jo bharosa tha soch par mujh ko

wo bhi parwardigar chhor diya

ham ne to asra khuda ka bhi

jo ke tha paidar chhor diya

be wafa jab lagi mujhe main ne

zindagi hi se pyar chhor diya

main ne to shaghl-e-shayari rahat

jab hua dil pe bar chhor diya