آئنہ دیکھنا انگشت بدنداں رہنا

آئنہ دیکھنا انگشت بدنداں رہنا

اس نے تو ہم کو بھی سکھلا دیا حیراں رہنا

ڈگمگا جائیں قدم راہ طلب میں کس وقت

تو مرے ساتھ مرے شوق گریزاں رہنا

دل نازک کو لگانا تھا ٹھکانے یا رب

اس کے بس کا نہیں نزدیک رگ جاں رہنا

جو ہوا طور پہ اس میں نہیں حیرت کوئی

ابن آدم کی تو تقدیر ہے حیراں رہنا

تیرے معیار پہ اے زندگی رہنا ہے کٹھن

سیکھ لے تو ہی مری شان کے شایاں رہنا

میں تو کر گزروں گا جو دل میں مرے آئے گی

مجھ کو منظور نہیں اپنا نگہباں رہنا

اس کی نظروں میں کہیں یہ بھی عبادت ہی نہ ہو

عمر بھر خود سے مرا دست و گریباں رہنا

دور حاضر کی بدلتی ہوئی ان قدروں میں

کتنا دشوار ہے انسان کا انساں رہنا

aina dekhna angusht badnidan rahna

us ne to ham ko bhi sukhla diya hairan rahna

dagmaga jaen qadam rah-e-talab mein kis waqt

tu mire sath mire shauq gurezan rahna

dil-e-nazuk ko lagana tha thikane ya rab

us ke bas ka nahin nazdik rag-e-jan rahna

jo hua tur pe is mein nahin hairat koi

ibn-e-adam ki to taqdir hai hairan rahna

tere meyar pe ai zindagi rahna hai kathin

sikh le tu hi miri shan ke shayan rahna

main to kar guzrunga jo dil mein mire aegi

mujh ko manzur nahin apna nigahban rahna

us ki nazron mein kahin ye bhi ibadat hi na ho

umr bhar khud se mira dast-o-gareban rahna

daur-e-hazir ki badalti hui in qadron mein

kitna dushwar hai insan ka insan rahna